ШӘМҒОЛОВ Фәттәх Ғәфүрйән улы
ШӘМҒОЛОВ Фәттәх Ғәфүрйән улы [4.8.1921, АСБР‑ҙың Юрматы кантоны 2‑се Ялсы а., хәҙер БР‑ҙың Күгәрсен районы Ялсы а., — 19.4.1945, Моравска‑Острава ҡ. эргәһендә (Чехословакия), Пшина ҡ. ерләнгән, Польша], Советтар Союзы Геройы (1946). Майор. Б.В. һуғышында ҡатнашыусы. Свердловск хәрби пехота училищеһын (1941), “Выстрел” РККА‑ның командирҙар составын камиллаштырыу юғары атыу‑тактика курстарын (1942) тамамлаған. 1940 й. алып Ҡыҙыл армияла. 1942 й. майынан Брянск, Үҙәк, 1‑се һәм 4‑се Украина фронттарында хеҙмәт итә. Герой исеменә 38‑се армияның 101‑се уҡсылар корпусы 183‑сө уҡсылар дивизияһы 227‑се уҡсылар полкының командир урынбаҫары майор Ш. 1945 й. 18—19 апрелендә Моравска‑Острава ҡ. тирәһендә Опава й. аша сыҡҡанда күрһәткән батырлығы өсөн үлгәндән һуң лайыҡ була. Ленин (1946), Ҡыҙыл Байраҡ (1942, 1945), 3‑сө дәрәжә Кутузов (1945), Александр Невский (1943), 1‑се дәрәжә Ватан һуғышы (1944), Ҡыҙыл Йондоҙ (1943) ордендары менән бүләкләнгән. Ш. исеме Күгәрсен районының Ялсы һәм Мораҡ аа. урамдарға бирелгән; шул уҡ райондың Хоҙайбирҙе а. ул уҡыған мәктәп бинаһына мемориаль таҡтаташ, Мораҡ а. һәйкәл ҡуйылған.
И.Ғ.Кәримова
Тәрж. М.Х.Хужин