СТАРОВА Наталья Владимировна

СТАРОВА Наталья Владимировна (15.8.1923, Курск губернаһы Поляна а. — 26.11.2005, Өфө ҡ.), генетик. БР ФА‑ның почётлы академигы (1994), биология фәндәре докторы (1974), профессор (1990). БР‑ҙың атҡаҙанған фән эшмәкәре (1993). Харьков ауыл хужалығы институтын тамамлаған (1948). 1951 й. алып Степной урман‑тәжрибә станцияһында (Ставрополь крайы), 1956 й. — Украина урман хужалығы һәм агроурман мелиорацияһы ҒТИ‑нда (Харьков ҡ.) эшләй. 1983 й. башлап Биохимия һәм цитохимия бүлегендә лаборатория мөдире, 1988 й. — Биология институты директоры урынбаҫары; 1991 й. алып Ботаника баҡса‑институтында: директор, 1998 й. — баш ғилми хеҙмәткәр. Фәнни тикшеренеүҙәре тал һымаҡтар төрҙәрен селекциялау һәм гибридлаштырыуға, гетерозистың клонлы биологик моделен эшләп сығарыуға, урман ағас үҫемлектәренең генетикаһына арналған. С. тарафынан тал һымаҡтарҙа гетерозистың полиген механизмдары нигеҙләнгән, тал һәм тирәк сорттары сығарылған. С. етәкселегендә төп урман барлыҡҡа килтереүсе төрҙәрҙең, ш. иҫ. сәнәғәт бысраныуы шарттарында, популяцион-генетик структураһы өйрәнелгән, урмандарҙы селекцион юл менән яҡшыртыу юлдары билдәләнгән.

  Х е ҙ м.: Селекция ивовых. М., 1980; Пути генетического улучшения лесных древесных пород. М., 1985 (авторҙ.); Биоценотическая характеристика хвойных лесов и мониторинг лесных экосистем Башкортостана. Уфа, 1998 (авторҙ.).

В.П.Путенихин

Тәрж. Г.А.Миһранова