ПОДДЕНЕЖНЫЙ Григорий Максимович

ПОДДЕНЕЖНЫЙ Григорий Максимович (12.2.1924, БАССР‑ҙың Бәләбәй кантоны Никольский ҡсб — 18.10.2000, Өфө ҡ.), өлкән лейтенант. Дан орденының тулы кавалеры. Б.В. һуғышында һәм 1945 й. совет‑япон һуғышында ҡатнашыусы. СССР ЭЭМ‑ының Ленинград хәрби‑сәйәси училищеһын тамамлаған (1948). 1941 й. алып Бәләбәй районы МТС‑ында эшләй. 1942 й. башлап Совет армияһында. 1943 й. ғинуарынан Көньяҡ‑Көнбайыш фронттың 15‑се гвардия уҡсылар дивизияһында пулемётсы, октябрҙән 2‑се Украина фронтының 10‑сы айырым моторлаштырылған дивизияһында разведчиктар взводы командиры булып хеҙмәт итә. Дан ордендары менән сержант П. 1944 й. 7 ғинуарында Кировоград ҡ. (Украина ССР‑ы), 30 августта Тыргу‑Фрумос ҡ. (Румыния) һәм 18 декабрҙә Надьберенсонь ҡ. (Венгрия) янындағы алыштарҙа күрһәткән батырлығы өсөн лайыҡ була. Запасҡа сыҡҡандан һуң (1966) “Химпром” заводында (Өфө ҡ.) эшләй. 1‑се дәрәжә Ватан һуғышы (1985), 1‑се (1945), 2‑се (1944 й. ноябре) һәм 3‑сө (шул уҡ йылдың октябре) дәрәжә Дан ордендары менән бүләкләнгән. Өфө ҡ. 70‑се урта мәктәпкә П. исеме бирелгән, ул йәшәгән йортҡа мемориаль таҡтаташ, Бәләбәй ҡ. Геройҙар аллеяһында уға бюст ҡуйылған.

Ғ.Һ.Булатов

Тәрж. М.Х.Хужин