СОЛТАНАЕВ Йәүҙәт Тәлғәт улы

СОЛТАНАЕВ Йәүҙәт Тәлғәт улы (19.7.1948, Орск ҡ.), математик. Физика‑математика фәндәре докторы (1990), профессор (1991). РФ‑тың (2010) һәм БР‑ҙың (1997) атҡаҙанған фән эшмәкәре, РФ‑тың почётлы юғары профессиональ белем биреү хеҙмәткәре (2001). БДУ‑ны тамамлағандан һуң (1971) шунда уҡ эшләй: 1990 й. алып дифференциаль тигеҙләмәләр кафедраһы мөдире, 1982—83 йй. һәм 1988—2004 йй. математика факультеты деканы, бер үк ваҡытта 2001—12 йй. уҡыу‑уҡытыу эштәре буйынса проректор. 2013 й. башлап БДПУ‑ла уҡыта. Фәнни эшмәкәрлеге дифференциаль тигеҙләмәләргә, спектраль операторҙарға арналған. С. тарафынан Келдыш теоремаһы тибындағы ике яҡлы Таубер теоремалары табылған, М.В.Келдыш шарттарын ҡәнәғәтләндермәгән оператор коэффициенты өсөн сингуляр дифференциаль операторҙарҙың полиномиаль шәлкемдәренең спектраль асимптотикалары тикшерелгән, тарҡалмай торған сик шарттары булған кире спектраль мәсьәләләр сиселгән (В.А.Садовничий, А.М.Әхтәмов менән берлектә). БР‑ҙың фән һәм техника өлкәһендәге Дәүләт премияһы лауреаты (2011).

 Х е ҙ м.: Обратные задачи Штурма—Лиувилля с нераспадающими краевыми условиями. М., 2009 (авторҙ.).

А.М.Әхтәмов

Тәрж. Р.Ғ.Ғилманов