АҠЪЯР ҺЫУҺАҠЛАҒЫСЫ

АҠЪЯР ҺЫУҺАҠЛАҒЫСЫ, Ташлы йылғаһында (Таналыҡ й. ҡушылдығы). Быуаның һыу ағыҙғыс ҡапҡаһы йылға тамағынан һәм Хәйбулла районы Аҡъяр а. 3,4 км алыҫлыҡта урынлашҡан. Гидроузел ағыҙғысынан өҫтә йылғаның һыу йыйыу майҙаны 423 км², һыуһаҡлағыстың тулы күләме 49,4 млн м³, файҙалы күләме 49,2 млн м³; һыу өҫтө майҙаны 7,4 км², оҙонлоғо 9,4 км, уртаса киңлеге 0,96 км (максималь — 1,93 км), уртаса тәрәнлеге 6,6 м (максималь — 16 м). Гидроузел составы: уртаса баҫымға иҫәпләнгән, тупраҡтан өйөп һалынған, юғары һөҙәк бите нығытылған, һыртына асфальт түшәлгән, төптән һыу ағыҙғыслы плотина (оҙонлоғо 2,3 км, өҫкө һырты буйынса киңлеге 10 м, бейеклеге 17,8 м); һыу бүлгес канал (оҙонлоғо 528 м, төбөнөң киңлеге 80 м), боҙҙан һаҡланыу ҡоролмаһы (оҙонлоғо 145 м). Һыуы сөсө, гидрокарбонат‑сульфатлы, магний‑кальцийлы. Тәғәйенләнеше: ағымды көйләү, һыу менән тәьмин итеү. Шулай уҡ һуғарыу, балыҡ үрсетеү, рекреация маҡсаттарында файҙаланыла. 2000 й. төҙөлгән.

Ш.К.Шабаев

Тәрж. Д.К.Үзбәков