БУҘА

БУҘА, башҡорт аш‑һыуының традицион иҫерткес эсемлеге. Шыттырылған һәм төйөлгән арпанан, һуңыраҡ ҡурылған һәм онталған һоло ҡушылған бойҙайҙан әҙерләнгән. Ҡайһы ваҡыт күбекләнеп торһон өсөн туң май йәки эс майы ҡушҡандар. Ғәҙәттә байрам табынына итле һыйҙан һуң биргәндәр. Башлыса Башҡортостандың көньяҡ‑көнсығышында һәм Урал аръяғында әҙерләгәндәр. Ҡайһы бер төрки халыҡтарҙың аш‑һыуында осрай.

Әҙәб.: Шитова С.Н., Гаделгареева Р.Г. Злаки в повседневной, праздничной и обрядовой пище башкир в конце XIX — начале ХХ в. //Хозяйство и культура башкир в ХIX — начале ХХ в. М., 1979.

С.Н.Шитова

Тәрж. Ә.Н.Аҡбутина