АБДРАЗАҠОВ Асҡар Әмир улы

АБДРАЗАҠОВ Асҡар Әмир улы (11.7.1969, Өфө ҡ.), йырсы (бас). БР‑ҙың халыҡ артисы (1994). Ә.Ғ.Абдразаҡовтың улы. ӨДСИ‑не тамамлаған (1994; М.Ғ.Мортазина класы). 1999 й. алып Башҡ. дәүләт опера һәм балет театры солисы, бер үк ваҡытта 1995 й. башлап Рәсәйҙең Ҙур театры солисы, 2010 й. — БР‑ҙың мәҙәниәт министры, 2011 й. — Мариин театры (С.-Петербург ҡ.) солисы. 2019 й. алып Башҡ. дәүләт опера һәм балет театры художество етәксеһе. Киң диапазонлы һәм матур тембрлы тауышҡа эйә, уның башҡарыу оҫталығына сағыу артистизм һәм сәхнә һөйкөмлөлөгө хас. Төп партиялары: Собакин (“Батша кәләше” — “Царская невеста”, Н.А.Римский-Корсаков; дебют, 1991), Ҡоншаҡ (“Кенәз Игорь” — “Князь Игорь”, А.П.Бородин), Бөйөк инквизитор һәм Филипп II (“Дон Карлос”), Мысыр батшаһы һәм Рамфис (“Аида”; икеһе лә — Дж.Верди), Борис һәм Пимен (“Борис Годунов”), Досифей һәм Иван Хованский (“Хованщина”; икеһе лә — М.П.Мусоргский), Кочубей (“Мазепа”), Гремин (“Евгений Онегин”; икеһе лә — П.И.Чайковский), Мефистофель (А.Бойтоның шул уҡ исемле операһы), Дон Жуан һәм Лепорелло (“Дон Жуан”, В.А.Моцарт), Дон Базилио (“Севилья цирюльнигы” — “Севильский цирюльник”, Дж.Россини), Мефистофель (“Фауст”, Ш.Гуно) һ.б. Концерт репертуарында Дж.Пуччиниҙың “Месса Глория”һы, Д.Д.Шостаковичтың 13‑сө симфонияһы, Дж.Верди, А.Дворжак, В.А.Моцарттың Реквиемдары (бас партиялары), ватан һәм сит ил композиторҙары операларынан ариялар һәм вокаль әҫәрҙәр, урыҫ һәм башҡ. халыҡ йырҙары. “Арена ди Верона” (Верона ҡ.), “Ла Скала” (Милан ҡ.), Дж.Верди исемендәге Опера театрында (Триест ҡ.; бөтәһе лә — Италия), “Реал” (Мадрид ҡ.), “Лисео” (Барселона ҡ.; икеһе лә — Испания), Дәүләт операһы (Гамбург ҡ., Германия), “Шатле” (Париж ҡ.), “Метрополитен-опера” театрҙарында һәм “Карнеги-холл” залында (Нью-Йорк ҡ., АҠШ) сығыш яһай. К.Аббадо, И.К.Архипова, М.Л.Биешу, В.А.Гергиев, Н.Гяуров, Л.Маазель, Е.В.Образцова, В.И.Пьявко, М.Л.Ростропович һ.б. менән сығыш яһай. Рәсәй һәм донъяның 12 иле буйлап гастролдәрҙә була. М.И.Глинка исемендәге Бөтә Союз конкурсы (Алматы ҡ., 1991), Ф.И.Шаляпин исемендәге (Ҡазан ҡ., 1993), Көньяҡ Африка университеты (Претория ҡ., 1994), М.Каллас исемендәге (Афина ҡ., 1995, Гран-при), С.В.Рахманинов исемендәге (Мәскәү ҡ., 1997) халыҡ-ара конкурстар лауреаты; Ф.Виньяс исемендәге Халыҡ-ара конкурс дипломанты (Барселона ҡ., Испания, 1992). БР башлығының мәҙәниәт һәм сәнғәт мәсьәләләре буйынса кәңәшсеһе (2019 й. алып). Салауат Юлаев ордены менән бүләкләнгән (2019).

С.М.Платонова

Тәрж. Г.С.Балтабаева