ГЛАУКОНИТ

ГЛАУКОНИТ (грекса glaukós — күкһел йәшел), гидрослюдалар төркөмө минералы, тимер алюмосиликаты, (K, Na, Са)(Fe³⁺, Mg, Fe²⁺, Al)₂—[(Al, Si)Si₃O₁₀](OH)₂•H₂О. Составы буйынса селадонит (магнезиаль), сколит (глинозёмлы) һ.б. айырыла. Агрегаттары нескә бөртөклө, ваҡ тәңкәле, суғырмаҡлы. Төҫө төрлө сағылышлы йәшел, тоноҡ ялтырауыҡлы. Ҡатылығы 2—3, тығыҙлығы 2200—3000 кг/м³, йәбешкәклеге камил. Һыу татырлығын кәметеү, тупраҡты ашлау, йәшел буяу алыу өсөн сорбент булараҡ файҙаланыла; быяла сәнәғәтендә ҡулланыла. БР‑ҙа өҫкө рифей һәм вендтың ҡомташтарында, алевролиттарында, Башҡортостандың Урал алдындағы һәм Башҡортостандың Урал аръяғының көньяҡ өлөшөндәге аҡбур ултырмаларында (ҡара: Аҡбур) глауконит ҡомо ҡатлауҙары рәүешендә күҙәтелә.

Әҙәб.: Годовиков А.А. Минералогия. М., 1975.

А.А.Алексеев

Тәрж. Э.М.Юлбарисов