КАРПУХИН Иван Егорович

КАРПУХИН Иван Егорович (5.2.1936, БАССР‑ҙың Әлшәй районы Васильевка ҡсб — 21.4.2023, Стәрлетамаҡ ҡ.), фольклорсы. БР ФА‑ның почётлы академигы (2018), филология фәндәре докторы (1998), профессор (1998). БАССР мәктәбенең атҡаҙанған уҡытыусыһы (1986), БР‑ҙың атҡаҙанған фән эшмәкәре (2006), СССР юғары мәктәбе отличнигы (1980), РСФСР‑ҙың халыҡ мәғарифы отличнигы (1977), БР‑ҙың мәғариф отличнигы (1996), РФ‑тың почётлы юғары профессиональ белем биреү хеҙмәткәре (2000). Стәрлетамаҡ педагогия институтын тамамлаған (1960), 1962 й. алып шунда уҡ эшләй: 1967 й. башлап урыҫ теле һәм әҙәбиәте факультетында декан урынбаҫары, 1974—82 йй. декан, бер үк ваҡытта 1976—78 йй. башланғыс кластар факультеты деканы, 1982 й. башлап фәнни эштәр буйынса проректор; 2003—12 йй. — урыҫ һәм сит телдәр әҙәбиәте кафедраһы мөдире, бер үк ваҡытта 2003 й. алып ӨФһТУ‑ның Стәрлетамаҡ филиалында һәм БР ФА‑ның Ғәмәли тикшеренеүҙәр институтында лаборатория мөдире, 2017 й. алып баш ғилми хеҙмәткәр. 1966—2014 йй. Башҡортостанда үткәрелгән фольклор-этнографик экспедициялар етәксеһе. Фәнни эшмәкәрлеге Башҡортостанда урыҫ фольклорын, уның башҡа халыҡтар фольклоры менән үҙ-ара мөнәсәбәтен, башҡа этник даирәлә йәшәп килеүен өйрәнеүгә арналған. Ғәли Ибраһимов исемендәге премия лауреаты (2006). Халыҡтар дуҫлығы ордены менән бүләкләнгән (2016).

 Х е ҙ м.: Свадьбы в Башкортостане на стыке тысячелетий (состояние, поэтика, межэтнические контакты). 2-е изд., перераб. и доп. Уфа, 2011; Русский детский фольклор в Башкортостане. Уфа, 2013; Состояние русского детского фольклора в полиэтническом Башкортостане на стыке ХХ—ХХI веков. Уфа, 2018.

В.А.Беглов

Тәрж. Р.Ә.Сиражитдинов