ЗОРИН Сергей Иванович

ЗОРИН Сергей Иванович (11.9.1911, Өфө губернаһы шул уҡ исемле өйәҙе Крюковский а. — 6.2.1954, Өфө ҡ.), Советтар Союзы Геройы (1945). 1939—40 йй. совет-финлянд һуғышында һәм Б.В. һуғышында ҡатнашыусы. 1936—39 йй. һәм 1940—41 йй. Өфө трамвай депоһында эшләй. 1933—35 йй., 1939—40 йй. һәм 1942 й. алып Ҡыҙыл армияла. 1943 й. башлап Үҙәк, 1‑се һәм 2‑се Украина, 1‑се Белоруссия фронттарында хеҙмәт итә. Герой исеменә 2‑се гвардия танк армияһы 37‑се механизацияланған бригадаһы 3‑сө танк полкының танк механик-водителе старшина З. 1945 й. 16 һәм 23 ғинуарында Курчова-Весь а. янында һәм Мщонув ҡ. (икеһе лә — Польша) төньяҡ-көнбайыштараҡ алыштарҙа күрһәткән батырлығы өсөн лайыҡ була. Демобилизациянан һуң (1945) Өфө трамвай депоһының хәрәкәт хеҙмәте начальнигы, 1950 й. алып директоры. Ленин (1945), Ҡыҙыл Йондоҙ (1943) ордендары менән бүләкләнгән. Герой исеме Өфө ҡ. 1‑се трамвай депоһына һәм 129‑сы мәктәпкә бирелгән, депо территорияһында уға бюст һәм мемориаль таҡтаташ, Благовещен ҡ. — бюст, Благовещен районы Рождественский а. ул уҡыған элекке башланғыс мәктәп бинаһына мемориаль таҡтаташ ҡуйылған.

 Әҙәб.: П а в л о в Б. Товарищ Зорин //Славные сыны Башкирии. Кн.3. Уфа, 1968.

И.Ғ.Кәримова

Тәрж. Д.К.Үзбәков