КАМАЛОВ Таһир Таузах улы

КАМАЛОВ Таһир Таузах улы (2.6.1962, Өфө ҡ. — 4.1.2021, шунда уҡ), дирижёр. БР‑ҙың халыҡ артисы (1995). Гнесиндар исемендәге музыка-педагогия институтын тамамлағандан һуң (Мәскәү ҡ., 1989; В.М.Кожухарь класы) БДОБТ дирижёры, 1992—2011 йй. БР Милли симфоник оркестрының генераль директоры, художество етәксеһе һәм баш дирижёры, бер үк ваҡытта 1989 й. алып ӨДСА уҡытыусыһы һәм студенттар симфоник оркестры етәксеһе. Милли симфоник оркестрҙы, “Ағиҙел” (“Белая река”) Халыҡ‑ара симфоник һәм хор музыкаһы фестивален (Өфө ҡ., 1993 йылдан алып) ойоштороусы. “Бах фестивале” (“Баховский фестиваль”; 1998—2004), “Музыкаль хазинанан” (“Из музыкальной сокровищницы”; 1993—97), “Оркестр саҡыра” (“Оркестр приглашает”), “Раштыуа осрашыуҙары” (“Рождественские встречи”; икеһе лә — 1997 й. алып), “Евразия күпере” — “Рәсәй. Егерменсе быуат...” (“Евразийский мост” — “Россия. Век двадцатый...”; 2006—11; бөтәһе лә — Өфө ҡ.) концерттар циклын ойоштороусы һәм уларҙың художество етәксеһе. Германия, Польша, Украина, Швейцария, Япония симфоник оркестрҙары менән сығыш яһай. Халыҡ‑ара башҡарыусылар һәм дирижёрҙар конкурсы лауреаты (Женева ҡ., Швейцария, 1997). 

Тәрж. Г.Һ.Ризуанова