МОСТАФИН Таһир Исламнур улы

МОСТАФИН Таһир Исламнур улы [22.8.1953, БАССР‑ҙың Покровка районы Биштин а. (БР‑ҙың Благовещен районы)], хирург, патологоанатом. Медицина фәндәре докторы (1998), профессор (2000). БР‑ҙың атҡаҙанған табибы (2000). БДМИ‑ны тамамлағандан һуң (1980) 1983 й. тиклем Дыуан районы Мәсәғүт үҙәк район дауаханаһында эшләй. 1986 й. алып (өҙөклөк менән) БДМУ‑ла: 2000 й. башлап патологик анатомия кафедраһы мөдире, бер үк ваҡытта 2010—12 йй. дауалау факультеты деканы; 1994—2000 йй. Республика клиник дауаханаһы ҡарамағындағы Республика сепсисҡа ҡаршы үҙәге мөдире. Фәнни эшмәкәрлеге абдоминаль һәм эренле хирургия проблемаларына, ш. иҫ. ҡорһаҡ ҡыуышлығындағы, ҡорһаҡ тышындағы ағзаларҙың эренле‑шеш, диабетик табан ауырыуҙарының клиник-морфологик аспекттарына; патологоанатомик тикшеренеүҙәр ысулдарын камиллаштырыуға арналған. М. ҡатнашлығында таралған эренле киҫкен перитонитты дауалау, киҫкен панкреатиттың ауырлығын баһалау ысулдары, перитонит ваҡытында эсәктәге бөтәү яра кимәлен билдәләү алымдары һәм уның обтурацияһы өсөн яйланма эшләнгән. БР патологоанатомдары Рәсәй йәмғиәтенең Башҡортостан бүлексәһе рәйесе (2001 й. алып).

  Х е ҙ м.: Морфофункциональные особенности желчного пузыря при холецистите. М., 2010 (авторҙ.); Клинико-морфологические особенности синдрома диабетической стопы. М., 2011 (авторҙ.); Малотравматичные технологии в патологоанатомической практике. М., 2014 (авторҙ.).

Тәрж. Г.Ҡ.Ҡунафина