ЕМЕЛЬЯНОВ Данила Анатольевич

ЕМЕЛЬЯНОВ Данила Анатольевич (23.6.1980, Күмертау ҡ.), подполковник (2016). Рәсәй Федерацияһы Геройы (2017). Сүриәләге хәрби хәрәкәттәрҙә ҡатнашыусы. РФ Оборона министрлығының Новосибирск хәрби институтын тамамлаған (2003). 1998 й. алып РФ Ҡораллы көстәрендә. Герой исеменә Махсус операциялар көстәренең махсус тәғәйенләнештәге төркөмө командиры Е. Алеппо провинцияһында (Сүриә) дошмандың өҫтөнлөклө көстәренә  ҡаршы алышта күрһәткән батырлығы өсөн лайыҡ була. 2020 й. алып запаста. Мәскәү ҡ. йәшәй һәм эшләй. Батырлыҡ ордены менән бүләкләнгән (2016). Новосибирск юғары хәрби команда училищеһының Геройҙар аллеяһында Е. бюст ҡуйылған.

Е.А.Смирнов