ШӘҺИЕВ Абдулла Фәйзрахман улы
ШӘҺИЕВ Абдулла Фәйзрахман улы (23.2.1907, Уральск ҡ. — 4.5.1993, Ағиҙел ҡ., БР‑ҙың Краснокама районы Яңы Ҡабан а. ерләнгән), Советтар Союзы Геройы (1944, 1959 й. званиеһы алына, 1992 й. ҡайтарыла). Б.В. һуғышында ҡатнашыусы. 1‑се Атлы армия исемендәге Ҡыҙыл Байраҡлы кавалерия училищеһын тамамлаған (Шадринск ҡ., 1945).
1929—31 йй. һәм 1935—45 йй. Ҡыҙыл армияла. 1942 й. алып Сталинград, Ялан, Үҙәк, Белорус фронттарында хеҙмәт итә. Герой исеменә 16‑сы гвардия Чернигов кавалерия дивизияһы 58‑се гвардия кавалерия полкы пулемётчигы гвардия сержанты Ш. 1943 й. сентябрендә Днепр й. аша сыҡҡанда күрһәткән батырлығы өсөн лайыҡ була. Демобилизациянан һуң Төркмән ССР‑ында эшләй, һуңыраҡ Үзбәк ССР‑ында, Ҡаҙаҡ ССР‑ында, Удмурт АССР‑ында, 1986 й. алып Яңы Ҡабан а., 1992 й. — Ағиҙел ҡ. йәшәй. Ленин (1944), 2‑се дәрәжә Ватан һуғышы (1985) ордендары менән бүләкләнгән. Ағиҙел ҡ. Геройға бюст, ул йәшәгән йортҡа мемориаль таҡтаташ, Башҡ. гимназияһында уның исемендәге парта ҡуйылған.