СӘЙЕТОВ Илдар Ширҡәт улы

СӘЙЕТОВ Илдар Ширҡәт улы (25.1.1957, БАССР‑ҙың Баҡалы районы Яңы Ҡорос а. — 14.10.2020, Өфө ҡ.), актёр. РФ‑тың атҡаҙанған артисы (2008), БР‑ҙың халыҡ (2002) һәм атҡаҙанған (1994) артисы. Театр эшмәкәрҙәре союзы ағзаһы (1989). ӨДСИ‑не тамамлағандан һуң (1983; А.К.Лощенков, П.Р.Мельниченко курсы) Башҡ. дәүләт академия драма театры актёры, бер үк ваҡытта 1987–88 йй., 1995–2000 йй. ӨДСИ‑лә уҡыта.

 Ижадында сатира, гротеск һәм тәрән драматизмды берләштергән үҙенсәлекле актёр. 70‑тән ашыу төрлө пландағы ролдәр башҡара: Байбулат (“Ҡыр ҡаҙҙары”, Р.Ә.Сафин), Хәмит (“Ул ҡайтты”, Ә.Ҡ.Атнабаев), улар араһында урыҫ – Андрей Прозоров (“Апалы‑һеңлеле өсәү” – “Три сестры”, А.П.Чехов), Кудимов (“Өлкән улым” – “Старший сын”, А.В.Вампилов) һәм сит ил – Эстрюго (“Иҫ китмәле мөгөҙлө шәп ир” – “Великодушный рогоносец”, Ф.Кроммелинк), Жорж Одфей (“Минең ҡатынымдың исеме Морис” – “Мою жену зовут Морис”, Р.Шарт), Чесвик (“Кәкүк ояһы” – “Пролетая над гнездом кукушки”, А.Ә.Абушахманов, К.Кизиҙың шул уҡ исемле романы буйынса) – әҙәбиәте образдары айырыуса иҫтә ҡалырлыҡ. Шарж алымын оҫта ҡулланып, Вилдан ролендә (“Бибинур, ах, Бибинур!..”, Ф.М.Бүләков) киҫкен сатирик образ тыуҙыра. Кино һәм телефильм ролдәре: Пьер Безухов (“Ирлән көнө, йәки Урыҫ бәхете” – “День хомячка, или Русское счастье”; “Муха” студияһы “Башҡортостан” киностудияһы менән берлектә, 2003), Омар (“Айыу” – “Медведь”; “Vista Vision студияһы”, 2005) һ.б.

Т.Н.Хәйбуллина

Тәрж. Г.Һ.Ризуанова