АСАТУРОВ Григарт Христофорович

АСАТУРОВ Григарт Христофорович (4.8.1937, Ҡыштым ҡ. — 13.3.2018, Өфө ҡ.), хужалыҡ эшмәкәре. РФ‑тың (1996) һәм БАССР‑ҙың (1990) атҡаҙанған төҙөүсеһе. Грозный нефть институтын тамамлағандан һуң (1959) 21‑се треста (Өфө ҡ.) эшләй: 1970 й. алып баш инженер, 3‑сө төҙөлөш идаралығы начальнигы; 1980 й. — трестың баш инженеры, 1986 й. — идарасыһы, 1992—2000 йй. генераль директор. А. етәкселегендә “Уфанефтехим” (1982), “Уфахимпром” (1983), “Уфаоргсинтез” (1997) предприятиеларында химия һәм нефтехимия продукцияһын етештереү буйынса ҙур комплекстар һәм ҡулайламалар төҙөлгән; “Башгипробиосинтез” институты, Өфө ҡ. 3 АТС, “Башҡортостан” һәм “Турбаҫлы бройлерҙары” ҡошсолоҡ фабрикалары биналары, БР райондарында малсылыҡ комплекстары эшләнгән; Яңы Өфө нефть эшкәртеү заводында бензин етештереү ҡулайламаһына реконструкция үткәрелгән (1997). СССР МС‑ы премияһы лауреаты (1974). Халыҡтар дуҫлығы (1984), “Почёт Билдәһе” (1971) ордендары менән бүләкләнгән.

Тәрж. Г.Ҡ.Ҡунафина