АЛЁХИН Евгений Константинович

АЛЁХИН Евгений Константинович (19.12.1942, Өфө ҡ. — 20.12.2020, шунда уҡ), фармаколог. Медицина фәндәре докторы (1985), профессор (1988). РФ‑тың (2003) һәм БР‑ҙың (1995) атҡаҙанған фән эшмәкәре. БДМИ‑ны тамамлағандан һуң (1966) шунда уҡ эшләй, 1988—2011 йй. фәнни эштәр буйынса проректор, бер үк ваҡытта 1990—2018 йй. клиник фармакология курсы менән 1‑се фармакология кафедраһы мөдире. Фәнни хеҙмәттәре иммунофармакология проблемаларына, химик матдәләр тәьҫиренән һаҡлаусы дарыу эшләүгә арналған. А. тарафынан иммуномодуляторҙарҙы ҡайһы бер дарыу препараттары менән ҡатнаш ҡулланыуҙың законлыҡтары асыҡланған, яһалма пирамидин һәм бактериаль полисахаридтарҙың тәьҫир итеү механизмы өйрәнелгән. А. ҡатнашлығында иммунитетты стимуллаштырыусы препарат — оксиметилурацил эшләп сығарылған, бөйөр синдромлы геморрагик биҙгәкте дауалау өсөн йодантипирин индерелгән. Халыҡтар дуҫлығы ордены менән бүләкләнгән (2007).

 Х е ҙ м.: Иммунотропные свойства лекарственных средств. Уфа, 1993 (авторҙ.); Влияние лекарственных средств на процессы свободнорадикального окисления. Уфа, 2002 (авторҙ.); Иммурег. Уфа, 2004 (авторҙ.).

Тәрж. Г.Ҡ.Ҡунафина