ДӘҮЛӘТБАЕВ Фәтих Ислам улы
ДӘҮЛӘТБАЕВ Фәтих Ислам улы [27.3.1950, БАССР‑ҙың Покровский районы Ғүмәр а. (БР‑ҙың Благовещен районы) — 7.4.2020, Өфө ҡ., Благовещен районы Илек а. ерләнгән], ҡурсаҡ театры актёры. РФ‑тың атҡаҙанған (2010), БАССР‑ҙың халыҡ (1989) һәм атҡаҙанған (1978) артисы. Театр эшмәкәрҙәре союзы ағзаһы (1980). Башҡортостан республика мәҙәни-ағартыу училищеһын тамамлағандан һуң (Стәрлетамаҡ ҡ., 1972) Башҡ. ҡурсаҡ театры актёры. Актёрҙың сағыу һәләте уға иҫтә ҡалырлыҡ образдар тыуҙырырға мөмкинлек бирә: Былтыр (“Шүрәле”, Л.Сәйфуллин; дебют, 1972), Аладдин (“Аладдиндың серле лампаһы”, Н.В.Гернет), Сәсән, Самрау (“Сәсән йыры”, Ғ.Ғ.Шафиҡов; “Урал батыр” эпосы б‑са), Әлмәндәр ҡарт (“Әлдермештән Әлмәндәр”, Т.Ғ.Миңнуллин). Таяҡ [Бесәй (“Итекле бесәй”, М.Алтухов; Ш.Перроның ш. уҡ исемле әкиәте б‑са)], планшет [Бай, Хәйрүш, Тирмәнсе (“Серле ҡумта”, В.А.Лифшиц, И.Н.Кичанова)], марионетка [Вәзир (“Аладдиндың серле лампаһы”)] тибындағы ҡурсаҡтар менән эш итеү техникаһына эйә; битлектә лә тәбиғи уйнай: Бүре, Айыу (“Айыу бабай йоҡламай”, С.Әлибай), Шүрәле (“Шүрәленең төнгө уйындары”, Н.Ғ.Байбурин).
Тәрж. Г.Һ.Ризуанова