“БАШҠОРТОСТАН ХӨКҮМӘТЕНЕҢ ТЕЛЕ”, гәзит

“БАШҠОРТОСТАН ХӨКҮМӘТЕНЕҢ ТЕЛЕ”, ижтимағи‑сәйәси гәзит. Башҡорт хөкүмәтенең Ырымбур хәрби бюроһы органы. Ырымбур ҡ. 1918 й. 20 авгусынан аҙнаһына 2 тапҡыр иҫке башҡ. телендә (материалдарҙың бер өлөшө урыҫ телендә) сыға башлай. “Башҡорт” һәм “Башҡорт тауышы” гәзиттәре берләшеүе һөҙөмтәһендә булдырыла. “Яңы ваҡыт” типографияһында баҫтырыла. “Йәшәһен эшселәр төҙөгән йәмғиәт!”, “Йәшәһен автономиялы Башҡортостан!” лозунгылары аҫтында нәшер ителә. Гәзиттә Башҡ. хөкүмәтенең бойороҡтары, ҡарарҙары, большевиктарға ҡаршы мәҡәләләр баҫыла. Мөхәррирҙәре: Х.Ғ.Ғәбитов, Ғ.Р.Фәхретдинов. Ябылыу ваҡыты билдәһеҙ.

Тәрж. Р.М.Шәрипова