“БАШҠОРТ”, гәзит
“БАШҠОРТ”, ижтимағи‑сәйәси гәзит. Башҡорт мәркәз шураһы органы. 1917 й. 20 июленән Ырымбур ҡ., 1918 й. 6 июненән Силәбе ҡ. аҙнаһына 1 тапҡыр иҫке башҡ. телендә сыға. “Б.” Башҡорт милли хәрәкәте идеялары пропагандалана. Шулай уҡ Башҡорт хөкүмәтенең бойороҡтары, күрһәтмәләре, ҡарарҙары, съездарға, конференцияларға (ҡара: Бөтә башҡорт ҡоролтайҙары), Бөтә Рәсәй Ойоштороу йыйылышы һайлауҙарына әҙерлек барышы тураһында материалдар, большевиктарға ҡаршы мәҡәләләр баҫыла. 1918 й. 20 авгусында “Б.” һәм “Башҡорт тауышы” гәзиттәре берләшеүе һөҙөмтәһендә, Башҡ. хөкүмәте “Башҡортостан хөкүмәтенең теле” гәзитен ойоштора. Мөхәррирҙәре: Х.Ғ.Ғәбитов, Инан Әбделҡадир, С.Ғ.Мирасов.
Тәрж. Р.М.Шәрипова