ТИМЕРҒӘЛИЕВА Хәмдүнә Сәйетғәли ҡыҙы

ТИМЕРҒӘЛИЕВА Хәмдүнә Сәйетғәли ҡыҙы (24.5.1949, БАССР‑ҙың Борай районы Ҡотлояр а. — 14.9.2020, Ҡазан ҡ.), йырсы. ТАССР‑ҙың халыҡ (1991) һәм атҡаҙанған (1987) артисы, БР‑ҙың халыҡ артисы (2020). Башҡ. республика мәҙәни-ағартыу училищеһын тамамлаған (Стәрлетамаҡ ҡ., 1971). 1976–98 йй. Тат. филармонияһының солист-вокалисы. Көслө үҙенсәлекле тауышҡа эйә ине. Башҡарыу манераһына халыҡ йырҙары традицияларына эйәреү, хислелек, тәьҫирлелек хас. Репертуарында тат. халыҡ йырҙары, ш. иҫ. һирәк башҡарылған йырҙар, шулай уҡ тат. (Ф.М.Хәтипов, Ф.А.Әхмәтов, Р.М.Яхин һ.б.) һәм башҡ. (З.Ғ.Исмәғилев, А.М.Ҡобағошов, С.Ә.Низаметдинов, Р.М.Хәсәнов һ.б.) композиторҙары әҫәрҙәре. Мәскәү ҡ. ТАССР әҙәбиәте һәм сәнғәте көндәрендә ҡатнаша (1984). СССР, Рәсәй, Болгария, Төркиә буйлап гастролдәрҙә була. Ғ.Әлмөхәмәтов исемендәге призға Республика йәш йырсылар конкурсы (Өфө ҡ., 1971), “Татар йыры” Халыҡ‑ара эстрада фестивале (Ҡазан ҡ., 2013) лауреаты.

А.Р.Сабирова

Тәрж. Г.Һ.Ризуанова