БӘХТИЗИН Рәмил Нәзиф улы
БӘХТИЗИН Рәмил Нәзиф улы (30.3.1955, Өфө ҡ.), математик. БР ФА академигы. (2016), физика-математика фәндәре докторы (1992), профессор (1994). БР‑ҙың атҡаҙанған фән эшмәкәре (2001), РФ газ сәнәғәтенең почётлы хеҙмәткәре (1998), РФ‑тың почётлы юғары профессиональ белем биреү хеҙмәткәре (2010). Н.Р.Бәхтизиндең улы. ЛДУ‑ны тамамлағандан һуң (1977), ӨДНТУ‑ла эшләй: 1995 й. алып математик модель әҙерләү, 2006 й. башлап математика кафедраһы мөдире, бер үк ваҡытта 1998—2001 йй. иҡтисад һәм менеджмент факультеты деканы, 2001 й. — уҡыу-уҡытыу эштәре буйынса проректор, 2014—19 йй. ректор. 2011—15 йй. БР ФА президенты.
Фәнни эшмәкәрлеге нефть-газ сығарыу, нефтте ташыу һәм эшкәртеү процестарында, нефть-газ комплексы иҡтисадында математик модель әҙерләү ысулдарын ҡулланыуға арналған. Б. уйлап тапҡан ысулдар РФ‑тың яғыулыҡ сәнәғәте, энергетика предприятиеларында индерелгән. “Нефтегазовое дело” (“Нефть һәм газ эше”) фәнни-техник журналының һәм шул уҡ исемдәге фәнни электрон баҫманың (2002 й. алып), “Вестник Академии наук Республики Башкортостан” (“Башҡортостан Республикаһы Фәндәр академияһының хәбәрҙәре”) журналының (2012—15) баш мөхәррире. БР Дәүләт Йыйылышы — Ҡоролтайҙың 6‑сы саҡырылыш депутаты. БР‑ҙың фән һәм техника өлкәһендәге Дәүләт (2019), Башҡортостан комсомолы (1986) премиялары лауреаты. Дуҫлыҡ ордены менән бүләкләнгән (Вьетнам; 2015).
Хеҙм.: Этюды о моделировании сложных систем нефтедобычи. Нелинейность, неравновесность, неоднородность. Уфа, 1999 (авторҙ.); Моделирование процессов нефтегазодобычи. Нелинейность, неравновесность, неопределённость. М.; Ижевск, 2004 (авторҙ.); Транспорт и хранение высоковязких нефтей и нефтепродуктов. Применение электроподогрева. М., 2004 (авторҙ.).
Тәрж. Р.Ғ.Ғилманов