АСҠАРОВА Йәүриә Насип ҡыҙы

АСҠАРОВА Йәүриә Насип ҡыҙы (15.4.1927, Стәрлетамаҡ ҡ. — 6.4.2011, Өфө ҡ.), гигиенист. Медицина фәндәре докторы (1970), профессор (1971). БАССР‑ҙың атҡаҙанған фән эшмәкәре (1977). БДМИ‑ны тамамлағандан һуң (1949) 2000 й. тиклем шунда уҡ эшләй: 1967—92 йй. дөйөм гигиена кафедраһы мөдире, бер үк ваҡытта 1974—82 йй. санитария-гигиена факультеты деканы. Фәнни тикшеренеүҙәре республиканың химия, нефтехимия һ.б. предприятие эшселәренең хеҙмәт шарттарын һәм һаулығын, эндемик ауырыуҙарҙың (анемия, боғаҡ, теш кариесы) этиологияһын өйрәнеүгә һәм республика территорияларында уларҙың таралыу зоналарын асыҡлауға һ.б. арналған. А. ауыр металдарҙың (баҡыр, ҡурғаш) һәм марганецтың эндемик боғаҡ ауырыуын барлыҡҡа килтереү тәьҫирен өйрәнә, уны иҫкәртеү сараларын эшләй; 43 органик бысратҡыс буйынса гигиена нормативтарын билдәләй.

Тәрж. Г.Ҡ.Ҡунафина