ЕМЕЛЬЯНОВ Евгений Иванович

ЕМЕЛЬЯНОВ Евгений Иванович (27.2.1952, Өфө ҡ.), тренер. Фехтование буйынса РСФСР‑ҙың атҡаҙанған тренеры (1989), СССР‑ҙың спорт мастеры (1971), бөтә Рәсәй категориялы судья (2017). РФ‑тың (2010) һәм БР‑ҙың (1997) атҡаҙанған физик культура хеҙмәткәре, РФ‑тың физик культура һәм спорт отличнигы (2007). П.Ф.Лесгафт исемендәге Ленинград физик культура институтын тамамлаған (1979). “Зенит” ирекле спорт йәмғиәте тәрбиәләнеүсеһе (тренерҙары Г.Н.Погадаева, Ю.Ю.Хозиков). “Зенит” ирекле спорт йәмғиәтенең Үҙәк советы чемпионы (1971—75). 1973 й. алып “Юлдаш” физик культура йорто тренеры; 1977 й. башлап БР Юғары спорт әҙерлеге үҙәгендә эшләй: тренер, 1985 й. алып бүлек мөдире, 1986—2019 йй. директор; бер үк ваҡытта 1980—85 йй. СССР‑ҙың үҫмер спортсылар йыйылма командаһы тренеры. Тәрбиәләнеүселәре араһында 16 СССР спорт мастеры. БР‑ҙың Фехтование федерацияһы президенты (1986 й. алып). “Башҡортостан Республикаһында күрһәткән хеҙмәттәре өсөн” (2021), Халыҡтар дуҫлығы (2004), Салауат Юлаев (2016) ордендары, 1‑се (2006) һәм 2‑се (1998) дәрәжә “Ватан алдында күрһәткән хеҙмәттәре өсөн” ордендарының миҙалдары менән бүләкләнгән.

Тәрж. Г.Ҡ.Ҡунафина