ХӘБИБРАХМАНОВ Хәниф Мирзаһит улы
ХӘБИБРАХМАНОВ Хәниф Мирзаһит улы (12.11.1948, БАССР‑ҙың Краснокама р‑ны Шушнур а.), скульптор. РФ-тың (2020) һәм БР‑ҙың (2006) атҡаҙанған рәссамы. Рәссамдар союзы ағзаһы (1982). Юғары художество‑сәнәғәт училищеһын тамамлағандан һуң (Мәскәү ҡ., 1978; педагогтары А.А.Мельник, Л.М.Олещенко) 1984 й. тиклем БДПИ‑ла уҡыта.
80‑се йылдарҙа классик портреттар һәм фигуралар, предметтар мөхите булған күләмле композициялар ижад итә: “Скульптор М.Р.Габе портреты” (ағас), “Переславль ҡыҙы Оля” (эзбизташ), “Гобелен эшләүселәр” (металл). 90‑сы йылдарҙа реалистик формаларҙы үҙгәртеп, художестволы образды сағылдырыуҙа драматизмды көсәйтә: “Е.Клеймёнов иҫтәлегенә”, “Р.Нуриевҡа бағышлама”, “Н.Латфуллин иҫтәлегенә” (бөтәһе лә — металл); лирик ҡатын‑ҡыҙ образдарын тыуҙыра: “Ҡыҙ‑ҡурай” (алюмин), “Һөйөмбикә” (бронза). Монументаль сәнғәт өлкәһендә байтаҡ эш ижад итә: һәләк булған янғын һүндереүселәргә (1988), Салауат Юлаевҡа (1993—2000), З.Ғ.Исмәғилевкә (2008) һәйкәлдәр, М.Ғ.Гәрәевкә һәйкәл‑бюст (1999), “Нур” театры бинаһындағы композициялар (2002—03; бөтәһе лә — Өфө ҡ), Салауат Юлаев музейы территорияһында 6 фигуранан торған скульптура комплексы (1988—91) һ.б. 1978 й. алып күргәҙмәләрҙә ҡатнаша. Шәхси күргәҙмәһе — Өфө ҡ (2009). Эштәре БДХМ‑да, “Мираҫ” картиналар галереяһында (Нефтекама ҡ.; ҡара: Һынлы сәнғәт галереялары) һаҡлана. БР‑ҙың Салауат Юлаев исемендәге дәүләт премияһы лауреаты (1992). “Башҡортостан Республикаһының һынлы сәнғәте” күргәҙмә‑конкурсы лауреаты (Өфө ҡ, 2008).
Әҙәб.: Б а г у м а н о в А.И., Ф а и з о в а Ф.А. Лауреаты премии имени Салавата Юлаева: ст.‑зарисовки о творчестве. Уфа, 1999; Пространство и форма. Выставка современной российской скульптуры: каталог /сост. И.Н.Оськина. Уфа, 2006.
Ф.М.Миңлеғолова
Тәрж. Г.Һ.Ризуанова