БИКТИМЕРОВ Әнүәр Нурислам улы

БИКТИМЕРОВ Әнүәр Нурислам улы [15.5.1920, Өфө губернаһы шул уҡ исемле өйәҙе Шишмә а. (БР‑ҙың Шишмә районы) — 25.10.2000, шунда уҡ], селекционер. Ауыл хужалығы фәндәре кандидаты (1974). Б.В. һуғышында ҡатнашыусы. БАХИ‑ны тамамлаған (1942). 1946 й. алып Йоматау умартасылыҡ техникумында уҡыта, 1952 й. — Благовар районының Сталин исемендәге колхозы агрономы. 1955 й. башлап Башҡортостан  игенселек һәм баҫыу культуралары селекцияһы ҒТИ‑ның өлкән ғилми хеҙмәткәре, 1982—85 йй. лаборатория мөдире. Фәнни хеҙмәттәре мал аҙығы культураларын селекциялауға арналған. Б. БР‑ҙа һәм РФ‑тың башҡа төбәктәрендә үҫтерелгән юғары уңдырышлы Чишминская 26 кукурузының гибридын һәм судан үләне сорттарын (Изумрудная, Северянка, Тугай, Чишминская ранняя) сығара. 2‑се дәрәжә Ватан һуғышы ордендары менән бүләкләнгән (1985).

 Х е ҙ м.: Рекомендации по возделыванию суданской травы в Башкирской АССР. Уфа, 1978.

Н.Р.Бәхтизин, Ә.Х.Шакирйәнов

Тәрж. М.Н.Моратшина